Zëvendëskryeministri i parë për Integrim Evropian, Zhvillim dhe Dialog i Kosovës, Besnik Bislimi, mori pjesë në Samitin e Ballkanit Perëndimor ‘’The Western Balkans Summit 2022’’, organizuar në Prishtinë nga revista prestigjioze The Economist, në bashkëpunim me Zyrën e Kryeministrit të Republikës së Kosovës.
Bislimi ishte pjesëmarrës në panelin e diskutimit për Zhvillimin dhe Rritjen e Ballkanit Perëndimor.
Zëvendëskyreministri Bislimi tha se ndër qëllimet e Qeverisë është që Kosova të njihet dhe identifikohet nga partnerët ndërkombëtarë për zhvillimin, rritjen e ekonomisë dhe sukseset e arritura. Ai foli mbi objektivat, prioritetet dhe vizionin e përqendruar në punësim, drejtësi, investime, eksport, formalizim të ekonomisë, energji, ambient, qëndrueshmëri, arsim dhe diasporë.
Në lidhje me arritjet e këtyre objektivave, zëvendëskryeministri tha se rrëfyes dhe tregues të suksesit janë rritja ekonomike prej 10.7 për qind, rritja e të hyrave buxhetore me 30 për qind, rritja e eksporteve me 2/3, rritja e investimeve të huaja direkte me 22 për qind dhe krijimi i 35.000 vendeve të reja të punës.
“Si burim i këtyre sukseseve dhe ajo çfarë ka kontribuar në këtë drejtim, u vlerësua kualiteti i demokracisë, stabiliteti politik, politikat e suksesshme anti-korrupsion dhe kualiteti i pakove të Ringjalljes Ekonomike të cilat adresuan sfidat e pandemisë dhe ato të energjisë elektrike”.
“Kosova ka qenë eksportues i stabilitetit në rajon në 18 muajt e fundit, dhe kjo ka qenë e reflektuar në një rrugëtim më të shpejtë edhe në përmbushjen e obligimeve në proceset e integrimit evropian. Vendi ynë, u rrit me 17 vende në indeksin e Transparency International, tregues ky i përkushtimit të Qeverisë edhe ndaj sundimit të ligjit”.
“Zëvendëskryeministri Bislimi foli edhe mbi atë se çfarë i ofron Kosova investitorëve potencialë dhe cilat janë pikat e forta të Kosovës ‘vis-a-vis’ rajonit, ku përmendi disa shembuj si politikat tatimore, krijimin e Gjykatave Tregtare, qasja e lirë në tregjet e BE-së dhe legjislacionin e harmonizuar me perspektivën evropiane”.
“Potenciali për tërheqjen e investimeve të huaja dhe sektorët premtues të Kosovës kalojnë nga teknologjia e informacionit deri te industria e prodhimit të ushqimit dhe pijeve, përpunimi i drurit, burimet natyrore, energjia dhe turizmi dimëror”.
