Nëse dëshironi të përgatitni një ëmbëlsirë për familjen këtë vikend, atëherë biskotat me shije limoni janë të duhurat.

Kjo recetë përgatitet për 25 minuta dhe është e paraparë të shërbehet për katër persona, transmeton Gazeta Sinjali.

Përbërësit:

250 gr miell, 100 gr sheqer, 100 gr gjalpë, 50 ml lëng limoni, 1 vezë, lëkura e një limoni e grirë në rende, 1 lugë e vogël pluhur për ëmbëlsira 100 gr sheqer pluhur dhe 50 gr sheqer.

Përgatitja:

Për përgatitjen e biskotave me shije limoni duhet të keni parasysh që përbërësit të jenë në temperaturë ambienti dhe limonët të jenë biologjik.
Me ndihmën e një rrahësi elektrik, në një enë qelqi rrihni gjalpin së bashku me 100 gr sheqer. Duke e vazhduar përzierjen hidhni lëkurën e limonit, vetëm pjesën e verdhë të grirë në rende, lëngun e limonit dhe vezën.

Miellin e sitini dhe e bashkoni me pluhurin pjekës.

Miellin e hidhni pjesë, pjesë në enën e qelqit, duke e përzier. Pasi të jetë bërë një brumë i plotë, e mbuloni enën me një qeskë kuzhine dhe e leni të pushojë për gati 30 minuta në frigorifer.

Pasi brumi të jetë bërë gati, përgatitni biskotat. Me dorë merrni pak nga brumi, duke i dhënë formë sfere me të dyja duart.

Brumin për biskota me shije limoni, e vendosni në pjatën me sheqerin e ngelur, duke e rrotulluar nga të gjitha anët dhe më pas e kaloni në sheqerin pluhur.

Brumin sferik të pudrosur me të dy llojet e sheqerit e vendosni në një tavë ku keni shtruar një letër kuzhine. Kështu do të vazhdoni derisa të mbarojë brumi për biskota me shije limoni.

Tavën me biskota e pjekni në furrë të para ngrohur në 180 °C për rreth 15 minuta./Gazeta Sinjali/