Bashkimi Evropian do t’ua ndërpresë fondet gjashtë qyteteve polake të cilat e shpallën veten “zona të lira nga LGBT” ose që i ndaluan fushatat për të drejtat e këtij komuniteti.

Presidenti Andrez Duda i ka fituar edhe pesë vjet në pushtet përmes një fushate zgjedhore ku u përfshinë edhe sulmet ndaj komunitetit LGBT, duke premtuar mbrojtje të vlerave konservatore.

Megjithatë, komisionerja e BE-së për Barazi, Helena Dalli, tha se qytetet që kanë themeluar rezoluta të ashtuquajtura “Rezoluta për të drejtat e familjes” janë refuzuar në kërkesën për binjakëzim me qytete të tjera, ku përfshihet edhe qasja në fonde.

“Vlerat e BE-së dhe të drejtat themelore duhet të respektohen nga 27 vendet anëtare”, tha Dalli, shkruan “Daily Mail”.

Ky vendim erdhi pasi kryeministri polak, Mateusz Moraëiecki, tha se është duke e shikuar mundësinë e tërheqjes së vendit nga Konventa Evropiane e Stambollit, e cila lufton dhunën familjare.

Qeveria e ka cilësuar këtë traktat si të njollosur në aspektin ideologjik dhe kryeministri polak tha se konventa ngre dyshime serioze, duke lënë të kuptohet se ai anon nga tërheqja e shtetit prej këtij dokumenti ndërkombëtar.

Konventa e Stambollit është iniciativë e Këshillit të Evropës dhe është hartuar me qëllim të luftimit të dhunës ndaj grave.

Me këtë konventë kërkohen të drejta të barabarta mes burrave dhe grave, obligohen autoritetet shtetërore të marrin masa parandaluese kundër dhunës ndaj grave, mbrohen viktimat dhe ndiqen shkelësit./Gazeta Sinjali/