Sir Geoffrey Nice, avokati britanik, i cili udhëhoqi ndjekjen penale të ish-udhëheqësit serb Slobodan Millosheviç, ka thënë se presidenti rus Vladimir Putin duhet të dalë në gjyq në Ukrainë këtë vit për krime lufte të kryera atje.
Duke komentuar luftën në Ukrainë, Sir Geoffrey tha se rasti “nuk mund të ishte më i qartë” kundër Putinit dhe nuk kishte “asnjë dyshim” për një zinxhir komandimi që të çonte te njeriu në Kremlin.
Kjo do të thoshte se “gjëja më e rëndësishme” ishte që të gjykohej vetë lideri rus, në vend të ushtarëve të rangut të ulët, tha ai për Broadcasting House, përmes BBC.
Ai shtoi se çdo gjyq “mund të jetë nesër në mëngjes, për sa më përket mua” dhe duhet të mbahet nga ukrainasit në gjuhën ukrainase. Vetë Putin nuk do të kishte nevojë të ishte i pranishëm, tha ai.
Sir Geoffrey spekuloi mbi një arsye të mundshme pse udhëheqësi rus nuk ishte përballur me veprime më të ashpra deri më tani – duke sugjeruar se mund të kishte një lëvizje për ta përjashtuar atë nga ndjekja penale si pjesë e një marrëveshjeje paqeje.
Nice i tha BBC-së se “ngurrimi” i Gjykatës Penale Ndërkombëtare (ICC) për të paditur Putinin ngriti “perspektivën e tmerrshme” se gjykata po i jepte përparësi një zgjidhjeje paqeje.
ICC hodhi poshtë idenë se kishte ndonjë “presion apo ndikim” mbi prokurorin, Karim Khan, për të vonuar çdo hetim dhe tha se urdhërarrestet do të lëshoheshin kur të ishin mbledhur prova të mjaftueshme.
Është jashtëzakonisht e vështirë të lidhësh një lider politik drejtpërdrejt me veprat e kryera nga forcat e armatosura mbi baza dhe, edhe nëse Putini do të akuzohej, vënia e tij në gjyq do të ishte sfiduese në mungesë të kolapsit të regjimit të tij.
