Pas ardhjes së VV-së në pushtet, Martin Berishaj mori pozitën e ambasadorit të Kosovës në Kroaci, i cili duket se ka probleme me shkrimin në gjuhën shqipe bazuar në një postim në Facebook.
Berisha është edhe autor i disa librave, mirëpo në këtë postim ka bërë shumë gabime drejtshkrimore, madje ka shkruar edhe me shkronja serbe.
Disa nga gabimet janë: vëndi, vërtetes, arrijtën, sespse e të tjera.
Kur ai u propozua për ambasador, u përfol numri i shtetësive që ai kishte. Në fillim e kishte shtetësinë malazeze, më pas e mori edhe atë sllovene. E pasi u bë ambasador, e mori shtetësinë kosovare.
Martin Berishaj përfundoi shkollën fillore dhe të mesme në Tuz të Malit të Zi, e pastaj aplikoi për studime në Fakultetin e Shkencave Sociale në Lubjanë, Slloveni, ku mbaroi studimet me nderime në vitin 1984, shkruan Insajderi.
Në Fakultetin e Arteve në Lubjanë mori titullin Master dhe Doktor, teksa së bashku me disertacionin e doktoratës botoi librin e titulluar “Fuqia e fshehur e Besës”. Deri më tani ka botuar pesë monografi dhe shumë artikuj ekspertësh.
Lëvizja Vetëvendosje nuk është angazhimi i parë partiak i Berishaj, duke qenë se ishte kryetar i partisë së parë politike shqiptare në Slloveni “Bashkimi Demokratik i Kosovës” që gjithashtu mori pjesë në zgjedhjet parlamentare sllovene në vitin 1990.
