Në mesazhin e tij për festën e Krishtlindjes, Ipeshkvi i Kosovës, Dodë Gjergji ka thënë se është e dhimbshme që kudo jetojnë shqiptarët ndjehet mosbesim për një të ardhme më të mirë.

Ai ka thënë se disa nga anëtarët e familjes evropiane i gjykojnë shqiptarët për mbishtresa kulturore, ndërkohë që është dashur të ndihmojnë në nxjerrjen nga e kaluara.

Në ceremoninë e pritjes nga Ipeshkvia e Kosovës, e cila bëri bashkë liderë institucionesh, të partive politike, diplomatë të vendeve të QUINT-it të akredituar në Kosovë e drejtues të Bashkësisë Islame të Kosovës, Dodë Gjergji tha se brenda shtëpisë së Zotit të gjithë janë të njëjtë.

“Falënderoj Zotin për mundësinë që na jep, të kremtojmë këtë festë të Krishtlindjes së bashku, në këtë moment solemn, me kryemyftiun e Kosovës Naim Tërnavën, me presidentin, me kryeministrat në ardhje e shkuarje, me gjithë ambasadorët, përfaqësues të ndryshëm të institucioneve, sepse vërtetë ne dallojmë kur dalim jashtë ndoshta, por kur hyjmë këtu brenda në këtë shtëpi të Zotit, atëherë ne nuk dallojmë nga njëri tjetri, sepse këtu ne ia kqyrim njëri- tjetrit vetëm shpirtin dhe ia dhurojmë zemrën. Në të vërtetë ky është mesazhi i Krishtlindjes”, tha Dodë Gjergji.

Dodë Gjergji përcjelli një pjesë të mesazhit të tij të Krishtlindjes, ku përmendi mosbesimin e shqiptarëve për një jetë më të mirë, dhe diskriminim që vendet e Bashkimit Evropian po i bëjnë Kosovës, duke e lënë të izoluar pa lëvizje të lirë në zonat e BE-së.

“Nuk mund të them se nuk është e çuditshme, por edhe e dhimbshme njëkohësisht, që gjithandej ku jetojnë shqiptarët ndjehet një lloj mosbesimi kolektiv për një të ardhme më të mirë. Dhe vërehet qartë se disa frenojnë proceset që shpijnë të ky qëllim, e në anën tjetër nuk mungojnë edhe ata që me kryeneçësi duan të na çojnë te fatet që i kanë përcaktuar për ne. Kjo kohë bëhet edhe më e pakuptimshme kur disa nga anëtarët e familjes evropiane, në vend që të na ndihmojnë ose të na nxjerrin nga e kaluara në pahën e identitetit tonë evropian, na gjykojnë për mbishtresa kulturore dhe na shtyjnë të iniciativa hibride, duke na konsideruar si një etnitet ndryshe nga ata”, tha ai.

Ai përmendi edhe fatkeqësinë që ndodhi muajin e kaluar në Shqipëri, ku tërmeti që goditi vendin la dhjetëra persona të vdekur, qindra të lënduar, e shumë familje pa shtëpi.

Këtu ai falënderoi të gjithë njerëzit që kanë ndihmuar Shqipërinë duke dhënë ndihma.

Dodë Gjergji inkurajoi njerëzit që të vazhdojnë të bëjnë vepra të mira. /Gazeta Sinjali/