Një takim i ri mes përfaqësuesve të Shteteve të Bashkuara dhe Iranit pritet të zhvillohet më 21 qershor në Burgenstock të Zvicrës, sipas njoftimit të bërë nga Ministria e Jashtme e Pakistanit.
Sipas deklaratës zyrtare, në bisedime do të marrin pjesë delegacione nga të dyja vendet, ndërsa rolin e ndërmjetësuesit do ta kenë përfaqësues nga Pakistani dhe Katari.
Takimi vjen në një periudhë tensionesh të vazhdueshme në rajon, pas deklaratave të fundit të Iranit lidhur me Ngushticën e Hormuzit dhe zhvillimeve që pasuan marrëveshjen e armëpushimit mes palëve.
Autoritetet pakistaneze kanë bërë të ditur se qëllimi i raundit të ri të bisedimeve është avancimi i pikave të dakorduara në memorandumin 14-pikësh të mirëkuptimit, i cili synon forcimin e dialogut dhe ruajtjen e stabilitetit.
Deri më tani, nuk janë bërë publike detaje shtesë mbi agjendën e takimit, por pritet që çështjet e sigurisë rajonale dhe zbatimi i marrëveshjeve të deritanishme të jenë në qendër të diskutimeve.
Takimi në Zvicër shihet si një përpjekje e re diplomatike për të ruajtur komunikimin mes Uashingtonit dhe Teheranit dhe për të shmangur përshkallëzimin e mëtejshëm të tensioneve në Lindjen e Mesme.
Sinjali – aty ku e vërteta flet para lajmit!