Zgjedhjet lokale që do të mbahen më 17 tetor dhe deri tani kanë ardhur 1500 pako me fletëvotime nga diaspora, shkruan Gazeta Sinjali.
Këtë e ka konfirmuar për Sinjalin, zëdhënësi i KQZ-së, Valmir Elezi.
Elezi ka thënë që mërgimtarët kanë kohë deri më 15 tetor t’i dërgojnë fletvotimet në Kosovë.
“KQZ është duke vazhduar me përgatitjet për organizimin e zgjedhjeve të 17 tetorit. Kanë mbetur pak më shumë se dy javë deri në ditën zgjedhjeve dhe natyrisht që nga momenti i shpalljes së këtyre zgjedhjeve, KQZ ka vazhduar fillimisht me miratimin e planit operacional dhe kryerjen e detyrave të cilat janë listuar në këtë plan operacional. Tashmë jemi në fazën përfundimtare të emërimit të anëtarëve të këshillit të vendvotimit, pra janë persona të cilët angazhohen në ditën e zgjedhjeve si komisioner, pra këtu bëhet fjalë për mijëra persona në të gjitha vendvotimet në Republikën e Kosovës dhe pas kësaj do të thotë emërimi i këtyre anëtarëve do të ndodhë në mbledhjen e KQZ-së që do të zhvillohet ditën e premte”, tha ai.
Zëdhënësi i KQZ-së ka thënë që shtypja e fletëvotimeve në Slloveni ka përfunduar. Deri më tash janë shtypur mbi 3 milionë fletvotime që nevojiten për zgjedhjet e 17 tetorit.
“Në Slloveni ka përfunduar shtypja e fletëvotime. Janë shtypur 3 milionë e 397 mijë e 200 fletëvotime, pra fletëvotimet për kryetar dhe asamblistë”, ka thënë ai për Sinjalin.
Për zgjedhjet e 17 tetorit janë regjistruar më shumë votues nga diaspora se në zgjedhjet e përgjithshme të 14 shkurtit.
