Kryeprokurori i Shtetit, Zejnulla Gashi, ka pranuar zyrtarisht detyrën të mërkurën nga ushtruesi i detyrës, Agron Qalaj, duke u zotuar se do të punojë për forcimin e sundimit të ligjit.
Gjatë ceremonisë së pranimit të detyrës, Gashi ka deklaruar se do t’u shërbejë të gjithëve dhe se do të jetë kryeprokuror i të gjitha palëve.
“Sapo e pranova detyrën nga ushtruesi i detyrës së Kryeprokurorit të Shtetit, zoti Qalaj. Faleminderit kolegëve për besimin e dhënë. Unë do të jem kryeprokuror i të gjithëve dhe së bashku të gjithë do të punojmë në forcimin e sundimit të ligjit”, u shpreh ai.
Gashi është dekretuar gjatë ditës së djeshme (e martë) nga ushtruesja e detyrës së presidentes, Albulena Haxhiu.
Në tetor të vitit 2023, presidentja e atëhershme, Vjosa Osmani, nuk e kishte dekretuar kryeprokurorin e Prokurorisë Speciale, Blerim Isufaj, për pozitën e Kryeprokurorit të Shtetit, me arsyetimin se ishin evidentuar dhjetëra shkelje në procedurën e përzgjedhjes.
Që nga ajo kohë, institucioni i Kryeprokurorit të Shtetit është udhëhequr nga ushtrues detyre.
Sinjali – aty ku e vërteta flet para lajmit!
