Nënkryetari i Partisë Demokratike të Kosovës, Xhavit Haliti, është shprehur i bindur se subjekti politik ku ai bënë pjesë do t’i fitojë zgjedhjet e ardhshme që pritet të mbahen në vend, transmeton Sinjali.

Duke folur në televizionin publik, Haliti ka thënë se partitë e tjera politike mund të mbajnë vija të kuqe ndaj PDK-së, por sipas tij, PDK do të jetë e para pas zgjedhjeve. Ka thënë se edhe nëse PDK mbetet në opozitë do ta mbështesin qeverinë e ardhshme.

“Le t’i mbajnë ata vijat e kuqe. Unë mendoj që ne do të fitojmë, por edhe nëse mbesim në opozitë do ta mbështesim qeverinë e ardhshme për interesin e shtetit. Opozitën do ta bëjmë në institucione dhe jo në rrugë”, ka thënë Haliti.

Nënkryetari i Kuvendit të Kosovës, ka lavdëruar shefin e tij partiak, Kadri Veselin i cili në prag të zgjedhjeve po thotë se do ta luftojë korrupsionin. Ai ka krahasuar deklarimet e Veselit dhe të partive të tjera të cilat sipas tij duan ta nxjerrin PDK-në në opozitë.