Presidenti i Serbisë, Aleksandar Vuçiq, është shprehur se deputeti i Listës Serbe në Kosovë, Ivan Todosijeviq, është dënuar “vetëm sepse ka thënë të vërtetën për Reçakun”.

Të martën, për shkak të mohimit të masakrës së Reçakut, në të cilën forcat serbe vranë 45 shqiptarë të Kosovës, më 1999, Todosijeviqit, iu konfirmua dënimi me dy vjet burgim.

Vuçiq përmes një video të publikuar në Instagram u shpreh se “është shkelur rëndë e drejta e Todosijeviqit për gjykim të drejtë”, për arsye që sipas tij, bazuar në Marrëveshjen e Brukselit midis Kosovës dhe Serbisë, Todosijeviq është dashur të gjykohet nga dy gjyqtarë serbë dhe një shqiptar dhe se atij “i është shkelur brutalisht edhe e drejta për mendim të lirë”.

Ai gjithashtu i bëri thirrje Bashkimit Evropian që “t’i porosisë shqiptarët në Prishtinë se ata duhet t’i përmbahen asaj që kanë nënshkruar dhe pranuar” me Marrëveshjen e Brukselit.

Todosijeviq në mars të vitit 2019 ka deklaruar se arsye për sulmet e NATO-s në ish-Jugosllavi ka qenë “e ashtuquajtura katastrofë humanitare në Kosovë dhe masakra e trilluar e Reçakut”.

Gjykata e Apelit në Kosovë të martën e konfirmoi aktgjykimin e Gjykatës Themelore në Prishtinë, me të cilin Todosijeviq është dënuar me dy vjet burgim, nën akuzat për nxitje të urrejtjes, përçarjes ose mosdurimit kombëtar, racor, fetar apo etnik.

Në zgjedhjet parlamentare që u mbajtën në Kosovë në muajin shkurt, Todosijeviq u zgjodh deputet i Kuvendit të Kosovës nga radhët e Listës Serbe, por pas vendimit të Gjykatës së Apelit ai e humb këtë pozitë. /GazetaSinjali/