Një rast tragjik ka ndodhur të enjten në mbrëmje në familjen Xhymshiti në Viti. Djali i tyre i mitur u ther me thikë për vdekje nga një bashkëmoshatar, në rrethana dhe për motive akoma të panjohura. Gazeta Sinjali raportoi se hetimet tashmë kanë nisur, ndërkohë që rastin e kanë konfirmuar edhe nga Policia.
Rasti e ka prekur edhe kryetarin e Lëvizjes Vetëvendosje në Viti, Nijazi Isaku, i cili e ka publikuar fotografinë e 17-vjeçarit që u vra mbrëmë në Viti.
Isaku ka konfirmuar se 17 vjeçari i vrarë është Blerton Xhymshiti nga fshati Lubishtë.
“Lajm i trishtë për humbjen tragjike të të riut tonë, Blerton Xhymshiti nga Lubishta. Shpreh ngushëllimet e mia më të sinqerta familjes Xhymshiti, të afërmve dhe shokëve për këtë humbje të madhe. Prehu në paqe Blerton! Zoti të shpërbleftë me Xhennet!”, ka shkruar Isaku në një postim në “Facebook”.
Ndryshe, i dyshuari për rastin u arrestua në vendin e ngjarjes dhe më pas është shoqëruar në stacion policor, ku ka dhënë deklaratë para hetuesve policorë.
Burimet e Sinjalit kanë bërë me dije se i dyshuari që u arrestua lidhur me këtë rast është A.Haxhiu, 16-vjeçar nga fshati Kabash i Vitisë.
Viktima fillimisht ishte dërguar për trajtim mjekësor në Viti, e më pas është transferuar në Gjilan, por përkundër intervenimeve, ndërroi jetë.
Vdekja e tij është konstatuar nga ekipi mjekësor që e mori për trajtim e më pas trupi i pajetë është tërhequr për t’u dërguar në IML për obduksion.
Hetimet tashmë kanë nisur me urdhër të Prokurorit të Shtetit.
Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.