Kryetari i Partisë Radikale Serbe (SRS), Vojislav Sheshel ka thënë se ushtria serbe duhet të kthehet në Kosovë, shkruan Gazeta Sinjali.

Pas ndalimit të hyrjes në Kosovë, të nënkryetarit të Beogradit, Goran Vesiq, Sheshel në njërin prej televizioneve serbe tha se pret që ushtria serbe të hyjë në Kosovë.  

“Që kur Metropoliti Amfilohije informoi publikun për tekstin origjinal të këngës ‘Elbi korri një vajzë kosovare’, ajo këngë më është rritur aq shumë në zemër sa që tani vetëm pres që ushtria e famshme serbe të kthehet në Kosovë. Kjo duhet të ndodhë një herë, nuk ka rrugë tjetër”, tha Sheshel.

Ndërsa, në një konferencë për media, Sheshel tha se duhet të jenë të gatshëm pasi që pajisja e Kosovës me armatim nga Gjermania, paralajmëron përgatitje për fillimin e një lufte tjetër.

“Ne duhet ta marrim atë shumë seriozisht dhe duhet të jemi të gatshëm për çdo eventualitet”, tha Sheshel në selinë e partisë së tij.

Sheshel ishte i dënuar për krime lufte nga Gjykata Penale Ndërkombëtare për krimet në ish-Jugosllavi në kohën sa ai ishte zëvendëskryeministër i Serbisë.

Ai u dorëzua vullnetarisht në Gjykatën Penale Ndërkombëtare të Hagës në shkurt të vitit 2003 por gjyqi i tij filloi deri në nëntor të vitit 2007. Më 31 mars 2016, ai u shpall i pafajshëm në një vendim të shkallës së parë. Më 11 prill 2018, Dhoma e Apelit e prishi pjesërisht vendimin e shkallës së parë, duke e shpallur Sheshelin fajtor për krime kundër njerëzimit për shkak të rolit të tij në nxitjen e dëbimit të kroatëve nga Hrtkovci. Ai u dënua me 10 vjet burg, por për shkak të kohës së kaluar në paraburgim të Gjykatës Penale Ndërkombëtare të Hagës, ai nuk ishte detyruar të kthehej në burg./Gazeta Sinjali/