Valon Loxha është personi që ia ka vjedhur veturën Gazmend Muhaxherit, kryetarit të Komunës së Pejës.

Gazeta Sinjali ka mësuar se Loxha me veturën e Muhaxherit ka shkuar në Rugovë.

Lajmin për Gazetën Sinjali e ka konfirmuar edhe zëdhënësi i Prokurorisë Themelore në Pejë, Shkodran Nikçi.

Ai ka bërë me dije se i dyshuari është ndaluar për 48 orë.

“Lidhur me këtë rast, me urdhër të prokurorit të shtetit është ndaluar një person i dyshuar, për 48 orë”, ka deklaruar Nikçi.

Ndryshe, Valon Loxha nga Peja u bë i njohur pas një kronike ku tregonte se i merr veturat që i gjen të hapura.

Loxha kishte deklaruar se kjo që po bën nuk është vjedhje. Ai pati thënë se i merr veturat që i gjen të hapura, ndërkaq e quante budallallëk të pronarëve se pse ata harrojnë t’i mbyllin veturat e veta. /Gazeta Sinjali/