Një video-incizim ka çuar në zbulimin e një arme automatike në Istog, ku një i mitur dyshohet për posedim të paautorizuar të armës.
Rasti është raportuar më 8 prill, ndërsa ngjarja lidhet me fshatin Drejë.
Siç mëson Sinjali, policia ka siguruar një video ku shfaqeshin rrethana që ngritnin dyshime për posedim të armës së zjarrit nga i dyshuari G.Z.
Pas kësaj, njësia e hetuesisë ka siguruar urdhër kontrolli nga Gjykata dhe ka bastisur shtëpinë dhe objektet përcjellëse të të dyshuarit.
Gjatë kontrollit janë gjetur dhe sekuestruar: një pushkë automatike AK-47, dy karikatorë, 46 fishekë të kalibrit të panjohur.
Gjatë intervistimit, i mituri ka pranuar posedimin e armës, duke deklaruar se së bashku me një shok e kishin gjetur në një pyll afër shtëpisë.
Lidhur me rastin është njoftuar prokurorja kujdestare për të mitur, e cila ka urdhëruar inicimin e rastit për veprën penale “Mbajtje në pronësi, kontroll ose posedim i paautorizuar i armëve”.
Ndaj të dyshuarit është caktuar masa e ndalimit policor për 24 orë.
Sinjali – aty ku e vërteta flet para lajmit!