Italiani Marco Verratti ka fituar titullin e Ligue 1 për herë të tetë në karrierën e tij, duke vendosur një rekord të ri në ligën franceze, transmeton Sinjali Sport.
Verratti iu bashkua gjigantëve të Ligue 1 nën Carlo Ancelotti në vitin 2012 dhe ka luajtur 374 ndeshje në Paris, duke fituar titullin e Ligue 1 tetë herë. Është një rekord i ri në historinë e Ligue 1.
Të tillë si Juninho Pernambucano, Thiago Silva, Grégory Coupet, Sidney Govou Hervé Revelli, Jean-Michel Larque e kishin fituar titullin francez shtatë herë.
Juninho, Coupet dhe Govou ishin pjesë e skuadrës legjendare të Lyonit që fitoi shtatë tituj radhazi në fillim të shekullit. Thiago Silva ishte bashkëlojtar i Verrattit në PSG. Ish-mbrojtësi i Milanit u largua nga Stade des Princes në fund të kontratës së tij në vitin 2020, duke iu bashkuar Chelseat si agjent i lirë.
Pavarësisht se është një nga mesfushorët më të mirë të Italisë, Verratti nuk ka luajtur kurrë në Serie A. Ylli i Azzurrit u largua nga Pescara në 2012 pasi fitoi një promovim në Serie A me I Delfini. Kontrata e tij në Paris skadon në vitin 2024. 29-vjeçari ishte pjesë e skuadrës italiane që fitoi Euron verën e kaluar.
