Presidenti amerikan Donald Trump ka njoftuar organizimin e një tubimi masiv në Uashington më 24 qershor, në kuadër të festimeve për 250-vjetorin e themelimit të Shteteve të Bashkuara të Amerikës.
Në një postim në platformën Truth Social, Trump bëri të ditur se ka vendosur të anulojë koncertet e planifikuara për këtë përvjetor, pasi disa artistë janë tërhequr nga pjesëmarrja. Në vend të tyre, ai premtoi një aktivitet madhështor që, sipas tij, do të jetë tubimi më i madh i organizuar ndonjëherë.
Festimet për jubileun e Amerikës do të përfshijnë një sërë aktivitetesh, mes tyre një shfaqje të madhe fishekzjarresh, një ngjarje të UFC-së në ambientet e Shtëpisë së Bardhë dhe një panair shtetëror që do të zgjasë 16 ditë.
Panairi do të zhvillohet nga 25 qershori deri më 10 korrik në National Mall, duke shtrirë aktivitetet nga Kapitoli amerikan deri te Monumenti i Uashingtonit. Sipas organizatorëve, të 56 shtetet dhe territoret amerikane do të përfaqësohen me ekspozita dhe aktivitete të veçanta.
Organizata Freedom 250, e krijuar me mbështetjen e Trumpit, ka bërë të ditur se presidenti do të udhëheqë ceremoninë hapëse të panairit. Ndërkohë, America250, një komision i themeluar nga Kongresi për përgatitjen e festimeve, do të organizojë gjithashtu aktivitete të shumta në të gjithë vendin.
Për organizimin e ngjarjeve, Kongresi amerikan raportohet se ka ndarë rreth 150 milionë dollarë fonde federale, ndërsa miliona të tjera janë siguruar nga partneritete private.
Sinjali – aty ku e vërteta flet para lajmit!