Presidenti i Shteteve të Bashkuara, Donald Trump, ka shprehur optimizëm për arritjen e një marrëveshjeje me Iranin, duke deklaruar se dokumenti përfundimtar mund të nënshkruhet shumë shpejt.
Gjatë një paraqitjeje në Zyrën Ovale, Trump e cilësoi procesin si një zhvillim pozitiv dhe tha se palët janë afër finalizimit të një marrëveshjeje që sipas tij mund të kontribuojë në uljen e tensioneve mes dy vendeve.
Ai bëri të ditur se dokumentet ndodhen në fazën përfundimtare të përgatitjes dhe se ceremonia e nënshkrimit mund të organizohet në Evropë në ditët e ardhshme.
Sipas presidentit amerikan, në ceremoninë e mundshme do të merrte pjesë edhe zëvendëspresidenti JD Vance, ndërsa ai shtoi se ka zhvilluar bisedime me disa liderë ndërkombëtarë lidhur me këtë proces, përfshirë kryeministrin izraelit Benjamin Netanyahu dhe udhëheqës të vendeve të Gjirit.
Deklaratat e Trumpit vijnë pasi ai njoftoi më herët se kishte anuluar sulmet e planifikuara ndaj Iranit, duke përmendur përparimin në negociata si arsye kryesore të këtij vendimi.
Megjithatë, autoritetet iraniane kanë deklaruar se ende nuk është miratuar asnjë dokument zyrtar, duke lënë të hapur paqartësinë rreth statusit real të marrëveshjes.
Sinjali – aty ku e vërteta flet para lajmit!