Rajoni separatist i Somalilandit në lindje të Afrikës, i cili nuk ka njohje ndërkombëtare, mund të marrë këtë status së shpejti, sipas raportimeve të gazetës britanike “The Guardian”. Burime nga rajoni bëjnë me dije se presidenti amerikan Donald Trump mund të jetë lideri i parë që do ta njohë Somalilandin, në këmbim të ndërtimit të një baze ushtarake pranë portit strategjik të Berberës në Gjirin e Adenit, shkruan Gazeta Sinjali.
Presidenti i Somalilandit, Abdirahman Mohamed Abdullahi, në një intervistë për “The Guardian” tha se njohja ndërkombëtare është “në horizont” dhe se vendi i tij po afrohet drejt këtij qëllimi, i cili mund të tensionojë situatën në Bririn e Afrikës — një rajon tashmë i trazuar.
Njohja do të shihej si një shkelje e sovranitetit nga Somalia dhe do të shqetësonte fuqitë rajonale, duke krijuar precedent për lëvizje separatiste në Afrikë.
Somalilandi, me rreth pesë milionë banorë, ka arritur stabilitet të përkohshëm dhe demokraci relative, por ende nuk është njohur si shtet i pavarur nga asnjë vend. Abdullahi tha se “është çështje kohe se kur dhe kush do të jetë i pari që do ta njohë” këtë republikë vetëshpallur. Ai shtoi se zyrtarë të lartë ushtarakë amerikanë kanë vizituar Hargeisën dhe një delegacion nga Uashingtoni do të vlerësojë bazën në Berberë.
Aktualisht SHBA ka bazën ushtarake Camp Lemonnier në Xhibuti, por po rriten shqetësimet për ndikimin në rritje të Kinës në rajon. Aeroplanmbajtëset amerikane pranë bregdetit të Somalilandit luajtën rol në fushatën e SHBA-së kundër rebelëve Houthi në Jemen.
Ndërkohë, SHBA nuk ka njoftuar ndonjë marrëveshje zyrtare me Somalilandin, por përpjekjet vazhdojnë për të garantuar sigurinë dhe tregtinë detare globale.
Sinjali – aty ku e vërteta flet para lajmit!