Presidenti i SHBA-së, Donald Trump, deklaroi se pret që armëpushimi i dakorduar në kuadër të marrëveshjes me Iranin të zbatohet në të gjitha frontet e konfliktit në Lindjen e Mesme, përfshirë edhe kufirin mes Izraelit dhe Hezbollahut në Liban.
Në një postim në platformën Truth Social, Trump u bëri thirrje palëve të përfshira që të respektojnë angazhimet e marra dhe të krijojnë hapësirë për vazhdimin e negociatave diplomatike.
“Ne presim një armëpushim të plotë në të gjitha frontet, përfshirë Libanin, Hezbollahun dhe Izraelin”, shkroi presidenti amerikan.
Deklarata e tij vjen pasi memorandumi i mirëkuptimit mes SHBA-së dhe Iranit parashikon ndërprerjen e menjëhershme dhe të përhershme të operacioneve ushtarake në rajon, duke përfshirë edhe territorin libanez.
Megjithatë, situata në terren mbetet e paqartë. Autoritetet izraelite kanë bërë të ditur se nuk planifikojnë të tërheqin trupat e tyre nga Libani, ndërsa mediat shtetërore libaneze raportuan për sulme të reja izraelite në jug të vendit gjatë ditës së enjte.
Zhvillimet e fundit tregojnë se zbatimi i armëpushimit në të gjitha frontet do të përballet me sfida të mëdha, pavarësisht përparimit diplomatik të arritur mes Uashingtonit dhe Teheranit.
Sinjali – aty ku e vërteta flet para lajmit!