Në një tubim në Teksas, zëvendëspresidentja amerikane Kamala Harris i është kundërpërgjigjur sulmeve të ish-presidentit Donald Trump, për identitetin e saj racor, duke thënë se “është e njëjta shfaqje e vjetër” dhe se “Amerika meriton më mirë se Trumpin”.
Reagimi i Harris vjen pasi Trump vuri në dyshim racën e saj duke thënë: “Ajo ishte gjithmonë me origjinë indiane dhe ajo vetëm po promovonte trashëgiminë indiane. Nuk e dija që ajo ishte me ngjyrë deri disa vite më parë”.
Bëhet e ditur se intervista e tij, e cila ishte menduar të zgjaste një orë, u ndërpre pas 34 minutash.
Ndërkohë Harris së fundmi u shfaq e shqetësuar dhe i mbajti të shkurtra komentet e saj për deklaratat e Trumpit, shkruan the Guardian.
“Është e njëjta shfaqje e vjetër: përçarje dhe mosrespektim. Dhe më lejoni të them vetëm, populli amerikan meriton më mirë. Populli amerikan meriton një lider që thotë të vërtetën. Një lider që nuk përgjigjet me armiqësi dhe zemërim kur përballet me fakte. Ne meritojmë një udhëheqës që kupton se dallimet tona nuk na ndajnë – ato janë një burim thelbësor i forcës sonë”, tha Harris.
Siç raportohet, në lidhje me komentet e Trumpit ka reaguar edhe ekipi i fushatës së Harris.
“Ajo si Amerika e pa Donald Trumpin është ajo si votuesit me ngjyrë e kanë njohur prej vitesh”, tha ekipi.
Ndryshe, Trump ka mbajtur një tubim në Pensilvani, i pari në shtet që nga atentati ndaj tij.
Ndërsa mbështetësit e prisnin kandidatin republikan në tubim, i cili filloi një orë me vonesë, ekranet gjigante e shfaqën një titull të vitit 2016 të Business Insider që i referohej Harris si “senatorja e parë indiano-amerikane”.
Komenteve të Trumpit i është kundërpërgjigjur edhe bashkëshorti i Harris, Doug Emhoff.
“Ai nuk duhet të jetë më në Shtëpinë e Bardhë”, tha Emhoff, duke shtuar se komentet e Trumpit “pasqyrojnë një version më të keq të një personi të tmerrshëm”.