Në një kohë kur sulmet kibernetike ndaj pajisjeve mobile janë gjithnjë e më të shpeshta, ekspertët paralajmërojnë se përdoruesit duhet të jenë të kujdesshëm ndaj ndryshimeve të pazakonta në funksionimin e telefonit të tyre, pasi ato mund të tregojnë ndërhyrje të mundshme nga hakerët.
Sipas specialistëve të sigurisë kibernetike, ka disa shenja kryesore që mund të sinjalizojnë se një pajisje është komprometuar.
Një nga treguesit më të zakonshëm është mbinxehja e telefonit pa arsye të dukshme. Nëse pajisja ngrohet edhe gjatë përdorimit normal, si shfletimi në rrjete sociale apo dërgimi i mesazheve, kjo mund të nënkuptojë se një program keqdashës po funksionon në prapaskenë dhe po shfrytëzon burimet e sistemit.
Shenja e dytë është shkarkimi i shpejtë i baterisë. Kur telefoni humbet energji më shpejt se zakonisht, edhe pa përdorim intensiv, kjo mund të jetë rezultat i aplikacioneve të fshehura që punojnë vazhdimisht dhe konsumojnë energji pa dijeninë e përdoruesit.
Ndërkohë, shenja e tretë është ngadalësimi i pajisjes dhe bllokimet e shpeshta. Nëse aplikacionet hapen me vonesë, telefoni ngec ose nuk reagon si më parë, kjo mund të tregojë se burimet e sistemit po shfrytëzohen nga softuerë të padëshiruar.
Ekspertët theksojnë se përveç këtyre simptomave, përdoruesit duhet të kenë kujdes edhe ndaj reklamave të papritura, mesazheve të dyshimta dhe aplikacioneve të panjohura që shfaqen në pajisje.
Si masa mbrojtëse rekomandohet rinisja e telefonit, fshirja e aplikacioneve të dyshimta, përditësimi i sistemit operativ dhe instalimi i aplikacioneve vetëm nga burime të sigurta.
Sinjali – aty ku e vërteta flet para lajmit!