Asamblisti në Komunën e Vitisë, Remzi Salihu nga radhët e Vetëvendosjes është dënuar me 3 muaj burgim me kusht dhe 150 euro gjobë pasi e ka pranuar se nuk e ka raportuar pasurinë në kohë.
Dënimi me kusht i shqiptuar në Gjykatën Themelore të Gjilanit, dega Viti dhe nuk do të ekzekutohet në afat prej një viti, nëse i akuzuari nuk kryen vepër tjetër penale.
Gjykatësja Drane Simani tha se i akuzuari obligohet që në emër të shpenzimeve procedurale të paguajë shumën prej 20 euro.
Ky aktgjykim është shpallur pasi që në seancën e shqyrtimit fillestar, të mbajtur më 19 tetor 2022, i akuzuari e kishte pranuar fajësinë për veprën penale për të cilën akuzohet.
Ndryshe, aktakuza e ngritur nga Prokuroria Themelore në Gjilan, më 6 shtator 2021, ngarkon Remzi Salihun, se në cilësinë e zyrtarit të lartë publik, Këshilltar i Asamblesë Komunale në Viti duke qenë i detyruar me ligj të bëjë deklarimin e pasurisë për vitin 2019 dhe atë brenda periudhës kohore prej datës 1 mars 2020 e deri më datën 19 qershor 2020 edhe pse i pandehuri ka qene i informuar për këtë obligim nuk e ka bërë një gjë të tillë brenda afatit ligjor, raporton “Betimi për Drejtësi”.
Me këtë, ai ngarkohet se ka kryer veprën penale ‘’Mos raportimi ose raportimi i rremë i pasurisë, i të ardhurave, i dhuratave, i dobisë tjetër materiale ose i detyrimeve financiare’’, nga neni 430, par. 1 të KPRK-së, i cili parasheh dënimin me gjobë ose me burgim deri në tre vjet.