Toyota ka prezantuar përditësimet për modelin Crown 2027, i cili në pamje të parë ka pak ndryshime, por risitë kryesore i ka nën kapak.
Prodhuesi japonez ka pajisur modelin me sistemin hibrid të gjeneratës së pestë, ndërsa ka bërë edhe disa ndërhyrje të vogla në dizajnin e jashtëm dhe në kabinë.
Sistemi i përditësuar hibrid përbëhet nga një motor 2.5-litërsh me katër cilindra dhe dy motorë elektrikë. Toyota nuk ka bërë të ditur fuqinë e kombinuar, por ka njoftuar se konsumi i vlerësuar nga EPA arrin në 40 milje për gallon, një më pak se modeli i vitit 2026.
Ky sistem do të përdoret në versionet XLE, Limited dhe Nightshade.
Versioni Crown Platinum do të vazhdojë të pajiset me sistemin Hybrid Max, që kombinon një motor 2.4-litërsh turbo me katër cilindra dhe dy motorë elektrikë. Fuqia e përgjithshme arrin në 340 kuaj fuqi, ndërsa sistemi shoqërohet me një transmision automatik me gjashtë shpejtësi.
Toyota Crown 2027 vjen standard me rrota 19-inçëshe, ndërsa si opsion ofrohen edhe rrotat 21-inçëshe. Në gamën e ngjyrave është shtuar nuanca e re e zezë “Inked”, krahas ngjyrave Oxygen White, Bronze Age, Heavy Metal, Finish Line Red dhe Storm Cloud.
Versioni Platinum tani do të ketë si standard kalipera të kuq të frenave dhe korniza të zeza të dritareve. Ndërkohë, versioni Nightshade do të marrë emblema të reja me ngjyrë të zezë.
Ndryshime ka edhe në interier. Toyota do të ofrojë ulëse me ngjyrë Saddle Tan në Crown Limited, ndërsa ky interier do të jetë opsional edhe në versionin Platinum. Klientët do të mund ta kombinojnë interierin Saddle Tan me ngjyrën e jashtme Bronze Age.
Toyota ende nuk ka bërë të ditur datën e saktë të daljes në shitje, por ka publikuar çmimet fillestare.
Crown XLE 2027 do të kushtojë nga 42 mijë e 935 dollarë, përfshirë tarifën e transportit prej 1 mijë e 295 dollarësh. Ky çmim është 200 dollarë më i lartë se më parë.
Crown Limited do të nisë nga 51 mijë e 15 dollarë, duke shënuar një rritje prej 3 mijë e 770 dollarësh. Versioni Nightshade do të kushtojë nga 50 mijë e 260 dollarë, ndërsa Crown Platinum do të nisë nga 56 mijë e 485 dollarë.
Sinjali – aty ku e vërteta flet para lajmit!