Legjenda e futbollit spanjoll, Fernando Torres, ka bërë një deklaratë që ka ngjallur shumë diskutime në botën e sportit, duke mos e përfshirë Lionel Messin në zgjedhjen e tij për futbollistin më të mirë aktual.
Në prag të një finaleje të mundshme të Kupës së Botës mes Spanjës dhe Argjentinës, Torres ka vlerësuar lart sulmuesin argjentinas Julian Alvarez, duke e cilësuar atë si lojtarin më të mirë në botë.
Spanja siguroi një vend në fazën finale pas një paraqitjeje bindëse ndaj Francës, ndërsa vëmendja tashmë është te gjysmëfinalja tjetër mes Argjentinës dhe Anglisë. Në rast kualifikimi të kampionëve në fuqi, shumë do të prisnin që Lionel Messi të ishte lojtari kryesor për t’u ndalur.
Por Torres mendon ndryshe. Ish-sulmuesi i Liverpoolit dhe Atletico Madridit ka thënë se Alvarez ka arritur një nivel të jashtëzakonshëm dhe meriton vlerësimin maksimal.
“Për mua, Julian Alvarez është lojtari më i mirë në botë, pa asnjë dyshim”, është shprehur Torres.
Sulmuesi argjentinas ka qenë një nga figurat më të rëndësishme të kombëtares së tij dhe ka fituar vëmendje të madhe pas paraqitjeve vendimtare në ndeshje të mëdha.
Deklarata e Torres ka hapur debat te tifozët, pasi shumë vazhdojnë ta konsiderojnë Lionel Messin, Kylian Mbappen apo Lamine Yamal si kandidatët kryesorë për këtë epitet. Megjithatë, vlerësimi për Alvarezin tregon ndikimin që ai ka pasur në skenën ndërkombëtare.
Sinjali – aty ku e vërteta flet para lajmit!