Numri i vdekjeve në Francë është rritur me 29.1 për qind gjatë javës 22-28 qershor, teksa vendi u përball me një valë të fortë të nxehti, njoftoi Agjencia e Shëndetit Publik të Francës.
Sipas autoriteteve, kjo përkthehet në 2,025 vdekje shtesë krahasuar me javën paraprake.
Rritja më e madhe e vdekjeve është regjistruar në rajonin Île-de-France, ku përfshihet edhe Parisi, me një rritje prej 62.8 për qind. Një rritje e ngjashme është raportuar edhe në rajonin perëndimor Pays de la Loire.
Temperaturat në shumë pjesë të Francës kaluan 40 gradë Celsius javën e kaluar, duke ushtruar presion të madh mbi shërbimet emergjente dhe spitalet, raporton Euronews, transmeton Sinjali.
Megjithëse autoritetet e kanë cilësuar këtë valë të të nxehtit si më intensive se ajo e vitit 2003, e cila shkaktoi rreth 15 mijë viktima, ato besojnë se ndikimi i përgjithshëm në shëndetin publik do të jetë më i kufizuar.
Drejtori i përgjithshëm i sistemit spitalor publik të Parisit, Nicolas Revel, tha se bilanci përfundimtar i viktimave nga vala e të nxehtit e qershorit pritet të jetë më i ulët se ai i vitit 2003, por “ndoshta” më i lartë se vala e të nxehtit e vitit të kaluar, e cila mori rreth 5,700 jetë.
Ndërkohë, opozita ka kritikuar reagimin e qeverisë ndaj temperaturave ekstreme. Të enjten, Partia e Gjelbër paraqiti një mocion mosbesimi kundër qeverisë së kryeministrit Sébastien Lecornu, duke e akuzuar atë se nuk e kishte përgatitur si duhet vendin për përballimin e temperaturave në rritje.
Sinjali – aty ku e vërteta flet para lajmit!