Të paktën 35 persona janë lënduar pasi një kamion përplasi një autobus pranë një baze ushtarake në Izraelin qendror, sipas shërbimeve izraelite të emergjencës (MDA).
MDA tha se gjashtë nga të plagosurit janë në gjendje të rëndë dhe pesë janë lënduar mesatarisht nga përplasja në Ramat Hasharon, në veri të Tel Avivit.
Viktimat janë dërguar në katër spitale të zonës.
Policia izraelite tha se një hetim paraprak tregoi se “një autobus u ndal pranë një stacioni autobusi për të lënë pasagjerët. Në të njëjtën kohë, një kamion mbërriti dhe u përplas me autobusin dhe pasagjerët në stacion.”
Policia shtoi se civilët në vendngjarje “qëlluan drejt shoferit të kamionit dhe e neutralizuan atë”.
Ngjarja po trajtohet si një sulm i qëllimshëm, tha policia.