Sipas dy burimeve të cituara nga agjencia e lajmeve Reuters në Gjirin Persik, Izraeli ka vrarë të paktën 14 shkencëtarë bërthamorë që nga fillimi i sulmit të tij ndaj Iranit.
Këto sulme kanë përfshirë “bomba makinash”, shtuan ata, shkruan Sky News.
Izraeli, i cili nuk ka nënshkruar traktatin global të mospërhapjes bërthamore (NPT) dhe besohet gjerësisht se posedon armë bërthamore, thotë se synon të ndalojë Iranin nga zhvillimi i armëve atomike.
Agjencia Ndërkombëtare e Energjisë Atomike deklaroi të enjten se Irani po shkel detyrimet e NPT.
Ndërkohë, sipas raportimeve të mediave, të paktën 406 persona janë vrarë nga sulmet izraelite në Iran, ka thënë një grup për të drejtat e njeriut.
Aktivistët e të Drejtave të Njeriut me bazë në Uashington raportojnë gjithashtu se 654 persona të tjerë janë plagosur nga sulmet, sipas Associated Press.
Shifrat mbulojnë të gjithë Iranin, shkruan Telegrafi.
Qeveria iraniane nuk ka publikuar ende shifrat e përgjithshme të viktimave.
Këto shifra vijnë pak kohë pasi presidenti Donald Trump tha se mbetet e mundur që Shtetet e Bashkuara të përfshihen në konfliktin Iran-Izrael.
“Është e mundur që ne të përfshihemi” në betejën e vazhdueshme midis armiqve të mëdhenj të Lindjes së Mesme, tha Trump në një intervistë, sipas ABC News, e cila tha se presidenti republikan theksoi se Shtetet e Bashkuara “nuk janë “për momentin” të përfshira në aksionin ushtarak.
Më herët të dielën, Trump i kërkoi Iranit dhe Izraelit të “bëjnë një marrëveshje” dhe t’i japin fund shkëmbimit të tyre vdekjeprurës të sulmeve.
“Irani dhe Izraeli duhet të bëjnë një marrëveshje dhe do të bëjnë një marrëveshje”, tha Trump në platformën e tij të mediave sociale “Truth”.
Ai ka shtuar se ka “shumë thirrje dhe takime që po zhvillohen tani” për këtë çështje dhe se paqja mund të arrihet “së shpejti” midis kundërshtarëve për një kohë të gjatë.
Sinjali – aty ku e vërteta flet para lajmit!