Të paktën 13 persona kanë humbur jetën dhe 66 të tjerë janë lënduar pas një shpërthimi në objektin më të madh të gazit në Katar.
Qendra kryesore e përpunimit të gazit natyror të lëngshëm (LNG) në qytet pësoi një “aksident teknik” në zonën industriale Ras Laffan të dielën në mbrëmje, njoftoi Ministria e Brendshme, ndërsa qielli mbi qytet u ngjyros në portokalli si pasojë e shpërthimit.
Ministri i Energjisë i Katarit, Saad Sherida al-Kaabi, deklaroi se shpërthimi nuk do të ndikojë në eksportet e vendit, duke shtuar se “ky ishte një aksident dhe jo një akt sabotimi apo sulm armiqësor”.
Porti Ras Laffan është porti artificial më i madh në botë dhe strehon objektin më të madh të eksportit të LNG-së në botë. Ai ishte shënjestër e sulmeve iraniane më herët gjatë këtij viti, raporton BBC, transmeton Sinjali.
Shpërthimi i së dielës tronditi dritaret dhe u ndje deri në qendër të Dohas, duke shkaktuar panik te banorët më shumë se 70 kilometra larg Ras Laffanit.
Al-Kaabi tha se qeveria po punon për të përcaktuar shkakun e shpërthimit që ndodhi në objektin lokal të furnizimit me gaz Barzan, duke theksuar se nuk ekziston asnjë rrezik mjedisor.
Megjithatë, ministri i Energjisë tha se është e vështirë të përcaktohet se kur do të rifillojnë operacionet.
“Prodhimi në fabrikë ishte ndalur plotësisht qëllimisht që nga dhjetori i vitit 2025 për shkak të nevojave urgjente për mirëmbajtje dhe ishte rindezur vetëm dy ditë më parë”, deklaroi ai.
Një hetim ka nisur për të zbuluar shkakun e aksidentit, ndërsa Al-Kaabi konfirmoi se të gjithë personat që humbën jetën ishin shtetas të Indisë dhe Pakistanit.
Ambasada e Indisë në Doha njoftoi se është në kontakt të vazhdueshëm me autoritetet e Katarit dhe do t’u ofrojë mbështetje familjeve të viktimave dhe të lënduarve.
“Shprehim ngushëllimet tona më të thella për familjet e atyre që fatkeqësisht humbën jetën në incidentin tragjik në Qytetin Industrial Ras Laffan mbrëmjen e kaluar”, thuhet në një postim të ambasadës në rrjetin social X.
Të dielën, kompania shtetërore e energjisë, QatarEnergy, konfirmoi se shpërthimi ndodhi në objektin lokal të furnizimit me gaz Barzan gjatë orëve të mbrëmjes së 21 qershorit.
Sinjali – aty ku e vërteta flet para lajmit!