Drejtori i Shëndetësisë në Komunën e Pejës, Petrit Loci, ka thënë se sot janë furnizuar me 950 doza të vaksinës antiCOVID, shkruan Gazeta Sinjali.

Ai tha se procesi i vaksimit për personat mbi moshën 65-vjeçare në Pejë do të nis tek të hënën.

“Sa i përket qytetit të Pejës ne sot nga mesdita jemi furnizuar me 950 doza vaksine dhe sot nuk kemi pasë mundësi teknike të fillojmë menjëherë me vaksinimin, derisa është planifikuar që nga dita e hënë të rifillojë vaksinimi i popullatës ashtu siç është e përcaktuar në bazë të grupmoshave”, tha ai në Klan Kosova.

Sipas tij, nuk do të lejojnë që gjatë vaksinimit të krijohet tollovi siç ka ndodhur sot para sallës “1 tetori”.

“Në Komunën e Pejës kemi përvojë të mirë sa i përket organizimit deri më tani, por edhe për shkak që numri i vaksinave është i vogël nuk besojmë se do të kemi tollovi të madhe. Në asnjë mënyrë nuk do të lejojmë që në qytetin e Pejës të krijohen radhët e gjata siç i kemi parë sot nëpër rrjete sociale dhe media”, shtoi ai.

Ai tha se këto doza të vaksinës kundër COVID-19 janë të pamjaftueshme për të mbuluar të gjitha kërkesat, pasi edhe interesimi i pejanëve ditëve të fundit është shtuar jashtëzakonisht shumë./Gazeta Sinjali/