Sulmet me dronë të Ukrainës kanë goditur të premten rafineri nafte në jug të Rusisë dhe portin e Taganrogut në Detin Azov, ku autoritetet shpallën gjendje emergjente dhe evakuuan disa banorë.
Kievi ka intensifikuar muajt e fundit përpjekjet për të dëmtuar kapacitetet financiare të Moskës për luftën në Ukrainë, duke sulmuar infrastrukturën energjetike ruse në kuadër të një fushate hakmarrëse. Këto sulme kanë kontribuar edhe në mungesa të karburantit në disa zona të Rusisë.
Ministria ruse e Mbrojtjes njoftoi se forcat e saj rrëzuan më shumë se 370 dronë ukrainas, përfshirë disa mbi rajonin e Moskës.
Në portin e Taganrogut, pranë territoreve të pushtuara të Ukrainës, pamjet e publikuara në rrjete sociale treguan kolona tymi mbi qytet. Guvernatori rajonal Yuri Slyusar tha se kishte vizituar portin pas sulmeve të “fuqishme” gjatë natës.
“Përpjekjet për shuarjen e zjarrit në produktet e naftës në port vazhdojnë”, deklaroi ai.
Slyusar tha se disa dhjetëra banorë të qytetit ishin zhvendosur në ambiente të përkohshme, duke paralajmëruar se zjarri në këtë lloj infrastrukture nuk mund të shuhet shpejt.
Më herët, ai bëri të ditur se dronët kishin goditur dy “depo nafte” në qytetin Azov. Në rajonin fqinj të Krasnodarit, autoritetet raportuan se dronët shkaktuan zjarr në rafinerinë e naftës Ilsky. Nuk u raportuan viktima.
Presidenti rus Vladimir Putin ka pranuar se sulmet ukrainase po shkaktojnë mungesa të karburantit dhe ka pretenduar se qëllimi i tyre është të përçajnë shoqërinë ruse.
Presidenti amerikan Donald Trump, i pyetur për sulmet e Kievit gjatë takimit me presidentin ukrainas Volodymyr Zelensky këtë javë, dukej se e mbështeti këtë fushatë.
“Është një përshkallëzim, por është gjithashtu një përshkallëzim që mund të ndihmojë në arritjen e fundit të luftës”, tha Trump.
Kremlini, megjithatë, deklaroi se presioni ushtarak ndaj Rusisë nuk do ta detyrojë atë të bëjë lëshime.
“Ne shohim disa keqkuptime brenda administratës së Shtëpisë së Bardhë, se rritja e presionit ushtarak mund të ndihmojë në arritjen e një marrëveshjeje paqeje. Ky është një qëndrim i gabuar”, tha zëdhënësi i Kremlinit, Dmitry Peskov.
Ukraina i cilëson sulmet si një kundërpërgjigje të drejtë ndaj bombardimeve ruse që kanë zgjatur më shumë se katër vjet dhe thotë se synimi është ta detyrojë Moskën të ulet në tryezën e negociatave.
Ndërkohë, komandanti i përgjithshëm i ushtrisë ukrainase, Oleksandr Syrsky, deklaroi të premten se një pikë kthese në luftën me Rusinë është ende “larg”, pavarësisht sukseset e fundit të forcave ukrainase.
Sipas tij, ushtria ukrainase ka ndalur përparimin rus në pjesën më të madhe të vijës së frontit gjatë muajve të fundit dhe ka kryer një seri sulmesh me rreze të gjatë ndaj rafinerive ruse të naftës.
Syrsky tha se gjatë gjashtë muajve të fundit Ukraina ka goditur me sukses 697 objektiva brenda territorit rus, ndërsa ka rritur fushatën e sulmeve hakmarrëse me rreze të gjatë.
“Sa i përket ritmit të përparimit, të dyja palët praktikisht kanë arritur barazi”, tha ai, duke shtuar se Rusia nuk duhet nënvlerësuar dhe se “jemi ende larg një kthese në luftë”.
Sinjali – aty ku e vërteta flet para lajmit!