Një sulm ajror izraelit në jug të Libanit ka shkaktuar vdekjen e tre pjesëtarëve të Forcave të Armatosura Libaneze, mes tyre një gjeneral brigade dhe një kapiten, sipas njoftimit zyrtar të ushtrisë së Libanit.
Sipas autoriteteve libaneze, automjeti ushtarak u godit gjatë orëve të mëngjesit në një zonë pranë fshatit Kfar Tebnit. Nga sulmi mbetën të vrarë një gjeneral brigade, një kapiten dhe një ushtar tjetër.
Forcat e Mbrojtjes së Izraelit (IDF) deklaruan se automjeti ishte identifikuar duke lëvizur në mënyrë të dyshimtë në një zonë që konsiderohet fushë aktive operacionesh ushtarake. Sipas ushtrisë izraelite, zona ishte evakuuar më herët dhe ekzistonin shqetësime për aktivitete të mundshme të Hezbollahut.
Në deklaratën e saj, IDF tha se forcat izraelite ndodheshin në gjendje gatishmërie të lartë për shkak të kërcënimeve të mundshme dhe se vendimi për goditjen u mor bazuar në informacionet operative dhe rrezikun e perceptuar për trupat në terren.
Më vonë, ushtria izraelite konfirmoi se në automjet ndodheshin pjesëtarë të ushtrisë libaneze dhe bëri të ditur se incidenti është nën hetim.
“IDF vepron kundër organizatës Hezbollah dhe jo kundër ushtrisë libaneze”, thuhet në reagimin zyrtar, duke shtuar se pas hetimeve do të nxirren përfundimet dhe masat e nevojshme.
Ngjarja vjen në një kohë tensionesh të vazhdueshme përgjatë kufirit Izrael-Liban, ku përplasjet dhe operacionet ushtarake kanë shtuar shqetësimet për një përshkallëzim më të gjerë të konfliktit në rajon.
Sinjali – aty ku e vërteta flet para lajmit!