Eranda Kumnova Baçi, e cila mori nën udhëheqje Drejtorinë e Arsimit në Komunën e Gjakovës më 22 dhjetor të vitit të kaluar, në CV-në e prezantuar në faqen zyrtare të Komunës, ka deklaruar se është e diplomuar në Fakultetin Juridik. Por e vërteta qëndron krejt ndryshe, pasi që drejtoresha e Arsimit në Gjakovë, nuk ka përfunduar ende studimet universitare, raporton Gazeta Sinjali.
Këtë e ka konfirmuar vetë Kumnova Baçi për Sinjalin, ku përmes një bisede telefonike ka deklaruar se në vitin 2020 ka përfunduar provimet të cilat i ka bartur nga Universiteti publik në kolegjin privat ‘Biznesi’ dhe ka paraqitur temën e diplomës, por që të njëjtën nuk e ka mbrojtur ende para Komisionit.
“Në kolegjin Biznesi i kom vazhdu provimet të cilat m’u kanë njoftë dhe ato që s’mu kanë njoftë m’u kanë shtu si provimet e tjera, dmth ka pasë ndryshime në provime. Ose për shembull nji provim ‘E drejta penale’ ka qenë e ndame në tri pjesë edhe këto i kom përfundu të gjitha provimet në vitin 2020. Qëkjo bartja edhe qëkjo që unë kom vazhdu këtu, kanë mendu që unë tash vonë kom fillu me kry universitetin në privat. Më ka ngel vetëm diploma si letër me marrë, vetëm diplomën me shku me marrë. Temën e kom paraqitë, po nuk e kom mbrojtë edhe diplomën kom me marrë. Qaq”, tha ajo për Sinjalin.
Drejtoresha e Arsimit në Gjakovë, e cila ishte edhe kandidate për asamble komunale nga radhët e Aleancës për Ardhmërinë e Kosovës në zgjedhjet e fundit lokale, po ashtu ka thënë se nuk e di nëse partia e saj është në dijeni që e njëjta nuk është e diplomuar.
Gazeta Sinjali ka provuar të kontaktojë edhe me kryetarin e Komunës, Ardian Gjini, për të marrë një prononcim lidhur me këtë çështje, por që i njëjti nuk është përgjigjur as në telefonatat e as në mesazhet e dërguara nga redaksia.
Kujtojmë se gjatë vitit 2020 në kohën kur AAK udhëhiqte me Ministrinë e Arsimit, partia kishte propozuar anëtarin e saj, Driton Bardheci, që të emërohet në pozitën e zëvendësministrit në Ministri.
Por i njëjti, po ashtu nuk kishte në atë kohë të përfunduara studimet themelore baçelor që është parakusht për të qenë numri dy në një dikaster qeveritar siç është Ministria e Arsimit.
