Këshilli i Ministrave në Shqipëri ka miratuar një paketë të re rregullash që ndryshon ndjeshëm procedurat e verifikimit në pikat e kalimit kufitar, duke sjellë standarde të reja në përputhje me Kodin e Kufijve Shengen të Bashkimit Evropian.
Vendimi shfuqizon rregulloret e mëparshme të viteve 2016 dhe 2023 dhe synon forcimin e kontrollit kufitar, rritjen e sigurisë dhe modernizimin e procedurave të kalimit.
Një nga ndryshimet kryesore lidhet me udhëtimin e të miturve. Sipas rregullave të reja, fëmijët nën 16 vjeç mund të udhëtojnë vetëm të shoqëruar nga një i rritur dhe me deklaratë noteriale të firmosur nga të dy prindërit. Ndërsa grupmosha 16–18 vjeç mund të udhëtojë edhe e pashoqëruar, por me autorizim të prindërve që përcakton vendqëndrimin dhe personin pritës.
Për fëmijët me prindër të divorcuar, kërkohet dokumentacion gjyqësor ose autorizim i të dy prindërve, ndërsa të dhënat do të regjistrohen në sistemin TIMS për kontroll më të saktë kufitar.
Rregullorja i jep gjithashtu kompetenca më të zgjeruara Policisë Kufitare për verifikime shtesë në rast dyshimi, me qëllim parandalimin e trafikimit dhe abuzimeve me të miturit.
Vendimi përcakton edhe kategori që përfitojnë kalim të përshpejtuar, përfshirë zyrtarë të lartë shtetërorë, diplomatë, përfaqësues të organizatave ndërkombëtare dhe forca të NATO-s, si dhe punonjës të shërbimeve emergjente.
Po ashtu, janë standardizuar procedurat e kontrollit sipas mjeteve të transportit, duke përfshirë rregulla të veçanta për makina, autobusë, tragete, avionë dhe trena, me synim lehtësimin e fluksit dhe rritjen e efikasitetit në pikat kufitare.
Vendimi hyn në fuqi pas botimit në Fletoren Zyrtare dhe obligon Policinë e Shtetit të përditësojë menjëherë sistemet dhe udhëzimet operative në të gjitha pikat kufitare të vendit.
Sinjali – aty ku e vërteta flet para lajmit!