Një terapi inovative e sistemit imunitar po sjell rezultate të jashtëzakonshme për pacientët që vuajnë nga lupusi i rëndë, duke hapur rrugën drejt asaj që ekspertët e cilësojnë si një revolucion në trajtimin e sëmundjeve autoimune.
Në një studim të zhvilluar nga studiuesit e UCL dhe NHS në Britaninë e Madhe, pesë nga gjashtë pacientë me lupus të avancuar hynë në remision vetëm pak muaj pas marrjes së terapisë së avancuar CAR-T, e njohur deri më tani kryesisht për trajtimin e disa llojeve të kancerit.
Trajtimi funksionon duke modifikuar gjenetikisht qelizat imunitare të vetë pacientit, të cilat më pas rikthehen në organizëm për të identifikuar dhe eliminuar qelizat që shkaktojnë sëmundjen. Sipas ekspertëve, kjo metodë nuk synon vetëm kontrollimin e simptomave, por “rivendosjen” e sistemit imunitar.
Rezultatet kanë qenë veçanërisht mbresëlënëse te pacientët që nuk kishin reaguar ndaj trajtimeve tradicionale. Përmirësime të shpejta janë vërejtur në funksionin e organeve të prekura, përfshirë veshkat, ndërsa disa pacientë kanë arritur të ndërpresin pothuajse të gjitha terapitë e mëparshme.
Një nga rastet më të spikatura është ai i 52-vjeçares Katie Tinkler, e cila pas vitesh luftë me sëmundjen, sot është në remision dhe ka rifituar një jetë normale.
Ekspertët theksojnë se nevojiten studime më të gjera për të konfirmuar rezultatet afatgjata, por vlerësojnë se kjo qasje mund të hapë perspektiva të reja edhe për trajtimin e sëmundjeve të tjera autoimune, përfshirë sklerozën multiple.
Nëse rezultatet vazhdojnë të jenë pozitive, terapia CAR-T mund të shndërrohet në një nga arritjet më të rëndësishme mjekësore të viteve të fundit në luftën kundër lupusit.
Sinjali – aty ku e vërteta flet para lajmit!