Një shofer treni ka humbur jetën dhe 89 persona janë lënduar pasi dy trena u përplasën në zonën e Bedfordit, ndërsa policia e ka shpallur ngjarjen si incident madhor.
Sipas Shërbimit të Ambulancës së Anglisë Lindore, 11 persona kanë pësuar lëndime shumë të rënda, 22 të tjerë janë lënduar rëndë, ndërsa 56 kanë marrë lëndime më të lehta.
Aksidenti përfshiu dy trena të kompanisë East Midlands Railway (EMR), të cilët po udhëtonin drejt jugut për në stacionin London St Pancras të premten pasdite. Shkaqet e aksidentit ende po hetohen.
Sekretari i përgjithshëm i sindikatës RMT, Eddie Dempsey, tha se sindikata është “e shkatërruar” nga lajmi se një shofer treni dhe ish-përfaqësues i RMT-së ka humbur tragjikisht jetën në këtë përplasje.
Në një deklaratë, Policia Britanike e Transportit (BTP) bëri të ditur se ka shpallur incident madhor pas përplasjes, e cila ndodhi rreth orës 17:15 sipas kohës lokale.
“Fatkeqësisht, një person u shpall i vdekur në vendin e ngjarjes. Ai është shoferi i njërit prej trenave të përfshirë dhe familja e tij është njoftuar”, thuhet në deklaratë.
Shërbimet e East Midlands Railway drejt dhe nga London St Pancras u pezulluan për pjesën e mbetur të mbrëmjes së së premtes dhe pritet që ndërprerjet të vazhdojnë edhe gjatë së shtunës.
Sinjali – aty ku e vërteta flet para lajmit!