Të paktën 35 persona janë vrarë dhe 134 janë plagosur në sulmin me raketa ruse në një bazë stërvitore ushtarake në Ukrainën perëndimore, tha guvernatori rajonal i Lviv.
Sulmet ajrore ruse goditën mëngjesin e sotëm Qendrën Ndërkombëtare të Paqeruajtjes dhe Sigurisë (IPSC) në distriktin Yavoriv, rreth 50 km në jug-perëndim të Lviv dhe rreth 25 km nga kufiri me Poloninë.
IPSC është një bazë e madhe ushtarake që përfshin një qendër trajnimi për ushtarët, kryesisht për misione paqeruajtëse.
Sipas informacionit të lëshuar nga administrata ushtarake rajonale e Lviv dhe të konfirmuar më vonë nga kryetari i bashkisë së Lviv, Andriy Sadovyi, forcat ruse lëshuan 8 raketa.
Sulmi i fundit tregon se Rusia po shton sulmet e saj në perëndim të vendit dhe mund të jetë një sulm i qëllimshëm ndaj dërgesave perëndimore të ndihmës ushtarake dhe humanitare në Ukrainë.
