Sot në Beograd u prezantua një peticion kundër vendosjes së sanksioneve kundër Rusisë, i cili deri më tani është nënshkruar nga më shumë se 200 figura publike, duke përfshirë akademikët Matija Beçkoviq, Kosta Çavoski dhe Vasilije Krestiq, peshkopët e KOS-it Irinej dhe David, drejtori Emir Kusturica dhe ish-ambasadori në Rusi Slavenko Terziq.
Peticioni kërkon nga presidenti i Serbisë, Aleksandar Vuçiq, Qeveria dhe “institucionet më të rëndësishme të popullit serb” të refuzojnë “presionin dhe shantazhin nga Perëndimi” dhe të mos vendosin sanksione ndaj Rusisë.
Vlerësohet se populli serb dhe rus kanë “lidhjet të ngushta” dhe “aleancë të përhershme”.
Nënshkruesit e peticionit shprehën shpresën se populli ukrainas do t’i “refuzojë” aleatët perëndimorë, të cilët, siç thonë ata, po i shtyjnë në një konflikt me “vëllezërit sllavë” për interesa egoiste, shkruan danas.
Sipas akademikut Matija Beçkoviq, Serbia nuk duhet t’i lejojë vetes “poshtërim” në formën e vendosjes së sanksioneve kundër Rusisë.
“As Hitleri nuk i kërkoi Serbisë të dërgonte ushtri në Frontin Lindor, ishte shumë për standardet e tij, si një lloj inçesti. Në kohën tonë nuk do t’i shkonte ndërmend asnjë kombi të vogël që të vendosë sanksione ndaj Rusisë, dikush i urdhëron jo për shkak të Rusisë, por për të ditur se kush është shefi i tyre”, tha Beçkoviq.
