Një pilot amerikan është vrarë në provincën Papua të Indonezisë në një sulm të kryer nga një grup separatist, duke rritur më tej tensionet në këtë rajon të trazuar.
Sipas Ushtrisë Çlirimtare të Papua Perëndimore (TPNPB), luftëtarët e saj kanë qëlluar pilotin dhe i kanë vënë zjarrin avionit në fshatin Balinggama, duke pretenduar se ai po transportonte trupa indoneziane.
Ndërkohë, autoritetet indoneziane kanë mohuar këto pretendime, duke deklaruar se në bord ndodheshin vetëm një pilot dhe shtatë pasagjerë civilë indigjenë papuas, të cilët nuk janë lënduar.
Sipas tyre, komunikimi me avionin është ndërprerë menjëherë pas uljes në një pistë të izoluar, ndërsa ekipet e shpëtimit nuk kanë mundur të arrijnë në vendngjarje për shkak të kushteve të vështira atmosferike.
Rebelët, nga ana tjetër, pretendojnë se aeroplani kishte shkelur ndalimin e fluturimeve civile në zonat që ata i konsiderojnë territor operativ, duke paralajmëruar se do të vazhdojnë sulmet ndaj avionëve që, sipas tyre, mbështesin operacionet ushtarake.
Ambasada amerikane ende nuk ka reaguar për incidentin, ndërsa situata në Papua mbetet e tensionuar për shkak të konfliktit të gjatë në rajon.
Sinjali – aty ku e vërteta flet para lajmit!