Ish-Kryeministri i Shqipërisë, Sali Berisha njoftoi sot në një konferencë për shtyp se ka depozituar padinë për shpifje ndaj Sekretarit të Shtetit Amerikan Antony Blinken.

Berisha deklaroi se është hera e parë që i drejtohet një gjykate dhe për të është e paimagjinueshme që të ngrejë padi ndaj sekretarit të shtetit të një vendi për të cilin ka një vlerësim të lartë.

“Sot, pas 77 vitesh jetë, kjo është hera e parë që unë i drejtohem një gjykate dhe kurrë ndonjëherë nuk kisha imagjinuar se do të ngrija padi ndaj sekretarit të shtetit të Amerikës që unë e admiroj kaq shumë si vend”, u shpreh ish-kryeministri, raporton Euronews Albania.

Në muajin maj Blinken njoftoi përfshirjen e Berishës dhe familjes së tij në listën e personave që u refuzohet hyrja në SHBA për “korrupsion”.

Berisha tha se pas kërkesave që Blinken t’i bëjë publike faktet mbi të cilat bazohej ky vendim, avokati i tij ka depozituar padinë për shpifje. Ai theksoi se ky ka qenë vendim politik pa asnjë bazë fakti. /GazetaSinjali/