Gazetarja Behare Bajraktari tha është larguar nga puna në Radio Kosova e pas saj është larguar nga puna edhe moderatorja Kaltrina Ajeti.
Bajraktari në një postim në Facebook, pretendoi se drejtori i ri i radios Arsim Halili e ka marrë këtë vendim që sipas saj ishte arbitrar dhe tinzar.
“Kjo është e papranueshme sepse nuk ka bërë asnjë vlerësim profesional, as nuk ka respektuar ligjin për RTK, as rregulloret, as nuk ka bërë matjen e publikut çka mendojnë ata”, ka shkruar Bajraktari.
Për këtë çështje ka reaguar Halili i cili thotë se Bajraktari nuk është larguar nga puna. Sipas tij asaj i është kërkuar më shumë angazhim në konceptin programor.
“Deklarimet se gazetarja është hequr nga RTK Radio janë të pavërteta, pasi përkundrazi i është kërkuar më shumë angazhim duke përfshirë edhe realizimin e konceptit programor të deritashëm të saj për promovimin e ambientit dhe gazetarisë së gjelbër”, ka shkruar ai në Facebook.
Qëndrim të njëjtë ka edhe Ajeti e cila po ashtu e ka quajtur vendim “arbitrar”.
Ajeti, përgjatë transmetimit të emisionit të saj të fundit, ka thënë se ky vendim është marrë meqë gjatë kohës kur ka qenë në pushim vjetor emisioni i saj është ritransmetuar.
Moderatorja Ajeti e ka quajtur arbitrar dhe të paprecedent vendimin për largimin e emisionit të saj nga skema programore e RTK-së.