Franck Ribery rrezikon të marrë një dënim shembullor për shkak të sjelljes së tij të pahijshme ndaj gjyqtarit anësor në përfundim të takimit Fiorentina-Lazio 1-2.

Francezi u shfaq nervoz që në momentin e zëvendësimit, diçka që nuk kishte ndodhur kurrë më parë, por me kartonin e kuq që mori pas vërshëllimës së trefishtë të kryesorit, tregoi se e kishte humbur toruan.

Vendimin e trajnerit Montella për ta ndërruar nuk e priti aspak mirë, duke tundur disa herë kokën, si për të treguar që nuk ishte dakord me të, por veprimi i tij ndaj anësorit Passeri, të cilin e shtyu hapur, është i patolerueshëm.

Për këtë arsye ka marrë kartonin e kuq në tunelin që të çon  në dhomat e zhveshjes.

Ribery mësohet se ka protestuar ashpër për një episod para se të shënohej goli i 2-1, duke pretenduar për ndërhyrje të gabuar të Lukakut ndaj Sottil.

Për shtyrjen e anësorit, francezi rrezikon një pezullim të gjatë, por gjithçka do të varet nga raporti i Passerit për rastin në fjalë./Gazeta Sinjali/