Volkswagen ka njoftuar se do të shkurtojë 50 mijë vende pune në Gjermani deri në vitin 2030, pasi fitimet e kompanisë ranë në nivelin më të ulët që nga viti 2016.
Shefi ekzekutiv Oliver Blume u tha aksionerëve se shkurtimet do të ndodhin në Gjermani dhe do të përfshijnë të gjithë grupin, duke përfshirë filialet e brandeve si Audi dhe Porsche. Prodhuesi më i madh i makinave në Europë tha se fitimet pas tatimit kishin rënë me rreth 44% në vitin 2025.
Kompania tha se ishte goditur nga tarifat e importit të SHBA-ve, konkurrenca e fortë nga Kina dhe kostot e larta të ristrukturimit për shkak të kalimit drejt automjeteve elektrike. Firma parashikon një rimëkëmbje vitin e ardhshëm, por shefi i financave theksoi se do të duhet të përqendrohen në uljen “rigoroze” të kostove.
“Në total, rreth 50 mijë vende pune pritet të shkurtohen deri në vitin 2030 në të gjithë Grupin Volkswagen në Gjermani,” tha Blume në një letër drejtuar aksionerëve në raportin vjetor të kompanisë, citon BBC. “Ne po operojmë në një mjedis krejtësisht të ndryshëm,” shtoi ai.
Grupi kishte arritur tashmë një marrëveshje me sindikatat për të shkurtuar mbi 35 mijë vende pune në vend në një mënyrë “socialisht të përgjegjshme” deri në vitin 2030, për të kursyer rreth 15 miliardë euro.
Volkswagen, së bashku me prodhuesit e tjerë gjermanë të makinave, është prekur rëndë nga rënia e kërkesës për makinat e saj në Kinë, një treg dikur shumë fitimprurës. Në të njëjtën kohë, markat kineze kanë hyrë në Europë, duke rritur konkurrencën për shitjet. Vendimi i presidentit amerikan Donald Trump për të vendosur tarifa 25% mbi importet e makinave e ka bërë situatën edhe më të vështirë.
Në shifrat vjetore, Volkswagen tha se fitimi neto pas tatimit ra nga 12.4 miliardë € në 6.9 miliardë € vitin e kaluar. Për vitin 2026, Volkswagen tha se parashikon një marzh fitimi bazë mes 4% dhe 5.5%, potencialisht edhe më i ulët se 4.6% që arriti këtë vit.
Shefi i financave të Volkswagen, Arno Antlitz, paralajmëroi se marzhi i fitimit të grupit “nuk është i mjaftueshëm në afat të gjatë” dhe tha se nevojiten shkurtime të mëtejshme të kostove.
“Ne mund ta realizojmë këtë vetëm nëse vazhdojmë të ulim kostot në mënyrë rigoroze,” tha ai. “Kjo është ajo ku do të përqendrohemi në muajt e ardhshëm.”
Sinjali – aty ku e vërteta flet para lajmit!