Prokuroria Speciale e Kosovës (PSRK) ka njoftuar se në vazhdën e hetimeve në kuadër të rastit “Mati”, është sekuestruar pasuri shtesë në vlerë mbi 2 milionë euro.
Sipas njoftimit të Prokurorisë, rasti është nën hetime në drejtim të veprës penale “shpëlarja e parasë”.
Në rastin e koduar me emrin “Mati”, gjatë muajit shtator të vitit të kaluar ishin arrestuar tre persona.
“PSRK njofton opinionin publik se në kuadër të këtyre hetimeve, deri tash pasuria e sekuestruar kap vlerën rreth 2,286,054.00 euro. Kjo pasuri shtesë është identifikuar gjatë hetimeve në bashkëveprim dhe mbikëqyrje të ngushtë me prokurorin e lëndës nga Prokuroria Speciale, në emrin e të dyshuarit Sh.C.”, thuhet në njoftim.
Merret vesh se pasuria i është sekuestruar, Shefqet Cakollit.
Gazeta Sinjali kishte raportuar ekskluzivisht për arrestimin e tij, në shtator të vitit të kaluar.
Ndërsa, sot njoftoi Prokuroria Speciale se me urdhër ndalues përfundimtar të Gjykatës Themelore në Prishtinë, Departamenti Special thuhet se janë sekuestruar “20 njësi banesore në sipërfaqe të tërësishme 1788.41 m², me vlerë të përafërt të tregut në lartësi 1,788,410.00 euro; 2 lokale afariste me sipërfaqe të tërësishme 167.54 m², me vlerë të përafërt të tregut në lartësi 335,080.00 euro; 17 vendparkingje (garazha) me sipërfaqe të tërësishme 241.96 m², me vlerë të përafërt të tregut 145,176,00 euro; 6 depo me sipërfaqe të tërësishme 28.87 m², me vlerë të përafërt të tregut 17,388.00 Euro”.
Sinjali – aty ku e vërteta flet para lajmit!