Incidentet te lokalet e ndryshme, sidomos ato që frekuentohen edhe pas mesnate janë goxha të shpeshta në Kosovë. Kërcënime, përleshje e konflikte të tjera janë vetëm disa nga rastet që ndodhin, por jo gjithmonë denoncohen në Polici. Kështu ka ndodhur në fillim të këtij muaji, te një restorant në Prizren, ku një person u sulmua dhe organet e rendit nuk u njoftuan, raporton Gazeta Sinjali.
Gazeta Sinjali ka siguruar pamje ekskluzive dhe ka mësuar se rasti ka ndodhur te dera e restorantit me muzikë live ‘Skenderbeu’ në Prizren, më 2 nëntor.
Sipas sinjalizuesve të Gazetës Sinjali, një grup prej disa personave fillimisht kanë pasur një konflikt verbal me viktimën, që dyshohet se ka nisur brenda restorantit dhe më pas ka vazhduar jashtë.
Gazeta Sinjali mëson ekskluzivisht se viktimë e këtij rasti është Avni Bytyqi.
Në pamjet që posedon redaksia, shihen disa persona teksa dalin nga restoranti dhe tre prej tyre afrohen te viktima Avni Bytyqi, vazhdojnë fjalosjen teksa në një moment, njëri papritmas e godet, e rrëzon përtokë dhe vazhdon ta sulmojë.
Sulmi ka ndodhur pas orës 22:00 dhe personat që shihen në pamje nuk ndërhyjnë për ta ndaluar të dyshuarin, por vetëm vëzhgojnë teksa e rrah.
Pas këtij momenti ka ndërhyrë vëllai i Avniut, Ilirjani, i cili sipas pamjeve ekskluzive që ka siguruar Gazeta Sinjali, shkon ta ndihmojë atë.
Por, gjithmonë siç shihet në pamjet – përfundon i rrahur edhe ai.
Ky rast nuk ishte denoncuar dhe kjo ishte konfirmuar edhe nga Policia Rajonale në Prizren, në një përgjigje për Gazetën Sinjali.
Por, pas raportimit të Sinjalit dhe publikimit të pamjeve, Policia ka nisur hetimet në lidhje me këtë rast.
Lajmi është konfirmuar nga zëdhënësi i Policisë për rajonin e Prizrenit, Shaqir Bytyqi.
“Lidhur me rastin pasi që i kemi parë videoregjistrimet, në konsultim me prokurorin kujdestar, Stacioni Policor Prizren-Veri ka inicuar rasti dhe rasti po hetohet nga Sektori i Hetimeve. Jemi ende ne fazën fillestare, duke identifikuar pjesmarrësit”, ka thënë ai për Sinjalin.
Për të marrë një deklaratë nga restoranti pse nuk e kanë raportuar përleshjen dhe për detajet e tjera, Gazeta Sinjali ka kontaktuar pronarin Dac Kastrati.
Kastrati ka deklaruar gjoja se nuk ka qenë në dijeni që ka ndodhur ndonjë përleshje, duke tentuar të arsyetohet se nuk i intereson nëse diçka ndodhë jashtë restorantit – megjithëse në pamje shihet se personat në fjalë dalin nga aty dhe pikërisht para derës nis rrahja.
“Nuk maj në mend unë. Jashtë restorantit ndodhin nashta…sa myshteria hin e del, sa myshteria fjaloset, mu s’më intereson. Aty dalin myshteria, vijnë mysafirë prej tjerave restorante, kanë bo fjalë në restorane tjera, ngatërrohen.“
Sipas informacioneve të para, disa nga personat që shihen në pamje janë familjarë të Kastratit, për çka ai tha se nuk ka ndonjë informacion.
“Me pasë qenë prezent familjarët e mi prezent, e kisha ditë rastin. Unë nuk e kom pa atë rast, nuk e di atë rast. Nëse familjarët e mi kanë mshefë, po më duket e paarsyeshme. S’kom kurrfarë informacione.“
Në bisedën e parë me Kastratin, redaksia përmend emrin e viktimës dhe të vëllait të tij – i cili po ashtu dyshohet se është sulmuar, por ai thotë se nuk i njeh se kush janë.
Por, pas disa minutash, i nervozuar e revoltuar, Kastrati telefonon sërish se siç duket iu “kujtuan” emrat e viktimave në këtë rast, duke i quajtur ‘drogirasha’ e ‘kriminela’.
“Për asi drogirasha, për asi narkomana, për asi që jonë kriminela të qytetit, që e dhunojnë një qytet, kurrë mo mos më pyet…”, thotë Dac Kastrati.