Kryeministri i Shqipërisë, Edi Rama, ka reaguar lidhur me protestën qytetare të mbajtur në bulevard, duke theksuar se kauzat publike duhet të mbështeten në fakte, dialog dhe arsye, e jo vetëm në qëllime të mira.
Përmes një reagimi publik, Rama iu referua shprehjes së njohur “Rruga për në ferr është e shtruar me qëllime të mira”, duke argumentuar se edhe nismat më fisnike mund të devijojnë nga qëllimi i tyre kur refuzohet debati dhe shqyrtimi i fakteve.
Kreu i qeverisë tha se i kupton dhe i respekton shqetësimet e qytetarëve që janë angazhuar në mbrojtjen e natyrës, të cilët ai i përshkroi me metaforën “flamingot rozë”. Sipas tij, shqetësimet e tyre janë të sinqerta, por ai kritikoi faktin se nuk po pranojnë të dëgjojnë argumentet e ekspertëve dhe institucioneve për të diskutuar zgjidhjet e mundshme.
Në të njëjtën kohë, Rama përdori metaforat “sorra” dhe “korba” për të përshkruar ata që, sipas tij, përpiqen të përfitojnë politikisht nga protestat, duke u mbështetur në teori konspirative, dezinformim dhe refuzim të fakteve.
“Kam dëgjuar flamingot, por nuk e kuptoj pse nuk ndahen nga sorrat”, u shpreh Rama, duke lënë të kuptohet se protestuesit me qëllime të sinqerta po qëndrojnë në të njëjtin front me grupime që, sipas tij, kanë interesa të tjera.
Deklarata e kryeministrit vjen në një kohë kur debati për çështjet mjedisore dhe protestat qytetare ka zënë vend të rëndësishëm në diskursin publik në Shqipëri.
Sinjali – aty ku e vërteta flet para lajmit!