Kryeministri i Shqipërisë, Edi Rama, ka shprehur shqetësimin e tij për ndikimin që protestat po kanë në sektorin e turizmit, duke paralajmëruar se situata po reflektohet në anulimin e rezervimeve nga turistët e huaj.
Gjatë podcastit “Flasim”, Rama tha se ka marrë raportime nga operatorë turistikë dhe biznese të sektorit, të cilët kanë evidentuar një rritje të anulimeve për sezonin veror.
Sipas tij, kjo gjendje po ndikon drejtpërdrejt në ekonominë lokale, të ardhurat e familjeve që varen nga turizmi dhe zhvillimin e përgjithshëm të industrisë turistike në vend.
Kreu i qeverisë komentoi gjithashtu protestat e zhvilluara së fundmi, duke theksuar se në to po marrin pjesë persona që nuk kanë lidhje të drejtpërdrejtë me zonat ku po organizohen tubimet.
Rama përdori tone të ashpra ndaj organizatorëve dhe pjesëmarrësve që, sipas tij, ushtrojnë presion ndaj qytetarëve me mendime të ndryshme, duke e cilësuar këtë qasje si të papranueshme për një shoqëri demokratike.
Ai bëri thirrje për ruajtjen e debatit demokratik dhe kundërshtimin e çdo forme presioni, kërcënimi apo bullizimi ndaj individëve për shkak të bindjeve të tyre.
Sinjali – aty ku e vërteta flet para lajmit!