Presidenti i Rusisë, Vladimir Putin, ka paraqitur një propozim të ri për zgjidhjen e ngërçit mes Shteteve të Bashkuara dhe Iranit lidhur me programin bërthamor të Teheranit, i cili ka qenë në qendër të tensioneve ndërkombëtare.
Gjatë një deklarate për media në Shën Petersburg, Putin sugjeroi që kontrolli mbi uraniumin e pasuruar të Iranit të kalojë nën mbikëqyrjen e Agjencisë Ndërkombëtare të Energjisë Atomike (IAEA), organi i Kombeve të Bashkuara përgjegjës për monitorimin bërthamor.
Sipas tij, një mekanizëm i tillë do të mund të ulte tensionet dhe të ofronte një zgjidhje të pranueshme për të dy palët, duke shmangur përshkallëzimin e mëtejshëm të konfliktit.
Putin theksoi se uraniumi i pasuruar mund të zhvendoset dhe të vendoset nën kontroll ndërkombëtar, duke rikujtuar edhe rolin e Rusisë në marrëveshjen bërthamore të vitit 2015 mes Iranit dhe fuqive botërore gjatë administratës së Barack Obamës.
Ai shtoi se si Shtetet e Bashkuara ashtu edhe Irani janë në dijeni të këtij propozimi dhe shprehu gatishmërinë e Moskës për të ndihmuar në rifillimin e negociatave, duke theksuar marrëdhëniet e saj me Teheranin.
Megjithatë, Putin pranoi se mbetet e paqartë nëse të gjitha palët do ta pranonin një zgjidhje të tillë, ndonëse ai vetë nuk sheh pengesa serioze për zbatimin e saj.
Sinjali – aty ku e vërteta flet para lajmit!