Protestuesit libianë besnikë ndaj gjeneralit Khalifa Haftar, bllokuan sot operimet në një port të madh nafte, një ditë para konferencës ndërkombëtare për Libinë, që do të mbahet në Berlin.

Trazirat politike kanë shqetësuar Libinë që nga përmbysja dhe ekzekutimi i diktatorit Moamer Gaddafi në vitin 2011. Vendi i Afrikës së Veriut ka aktualisht dy administrata konkurruese, qeverinë e mbështetur nga OKB-ja me qendër në kryeqytetin Tripoli dhe qeverinë e udhëhequr nga Haftar me qendër në Tobruk.

Udhëheqësit e fiseve në Libinë lindore të kontrolluar nga forcat e Haftarit, deklaruan se po mbyllnin fushat e naftës dhe portet në rajon. Sipas tyre të ardhurat e porteve u përdorën nga qeveria rivale e mbështetur nga OKB-ja, për të paguar luftëtarët që dyshohet se ishin dërguar nga aleatja e saj Turqia. /Gazeta Sinjali/