Gjykata Themelore në Prishtinë ka aprovuar kërkesën e Prokurorisë Speciale për tërheqjen e urdhërarrestit ndaj Milan Radoiçiqit, i cili ishte i dyshuar për veprën penale “Pjesëmarrja ose organizimi i grupit kriminal të organizuar”.

Vendimi për revokimin e urdhërarrestit ndaj Radoiçiqit është marrë me 23 shkurt të këtij viti, ndërkaq urdhërarresti ishte lëshuar më 14 gusht 2020.

Këtë kërkesë që u aprovuar nga gjykata, Prokuroria Speciale e Kosovës e arsyeton me faktin se që nga koha e lëshimit të urdhërarrestit të parë, Radoiçiqi nuk është sjellë para organeve të drejtësisë.

“Gjykata më datë 19.02.2021 e ka pranuar kërkesën për tërheqjen e urdhërarrestit nga Prokuroria Speciale të datës 19.02.2021 me arsyetimin se duke u bazuar në të dhënat e raportit të Policisë së Kosovës për përfshirjen e të dyshuarit Milan Radoiçiq në kryerjen e veprave tjera penale dhe fakti se që nga koha e lëshimit të urdhër-arrestit të parë, nuk ka mundur që i dyshuari të sillet para organeve të drejtësisë, respektivisht në Prokurorinë Speciale, për shkaqe teknike dhe taktike të hetimit më të mirë të veprave penale e që dyshohet se i njëjti është i përfshirë në kryerjen e tyre”, thuhet në vendimin e siguruar nga Telegrafi.

Sipas gjykatës, pas shqyrtimit dhe analizimit të kërkesës së Prokurorisë Speciale për tërheqjen e urdhërarrestit ndaj të dyshuarit, ka konstatuar se kërkesa është e arsyetuar mirë dhe e bazuar konform dispozitës së nenit 173 paragrafi 3 të KPPRK-së.

Më 23 nëntor të vitit të 2018,  Policia e Kosovës zhvilloi një operacion të kërkimit në veri të vendit me qëllim të arrestimit të Milan Radoiçiq i cili nuk u gjet në vendqëndrimin e tij, ndërsa gjatë këtij operacioni u arrestuan katër persona të tjerë.

Lideri i Nismës Qytetare “Liri, Demokraci, Drejtësi”, Oliver Ivanoviq, ishte qëlluar për vdekje mëngjesin e 16 janarit të vitit 2018.

Që nga ajo kohë, Prokuroria Speciale e Kosovës ka arritur t’i dëgjojë 40 dëshmitarë dhe t’i identifikojë tre persona që dyshohet se janë të përfshirë në vrasjen e tij./Gazeta Sinjali/